Militia Groups tai mat sai, Grau Maja Nga Ra sai

Lasang Awng Wa Peace Group's soldiers in Lawa Yang base before transforming a Militia group.


Yana zawn rai, KDA Militia, NDA-K Militia, Lawa Yang Militia, ni byin wa ai gaw, Kachin ni hkrat sum ai Kumla rai sai. ShawngLawt n’nan hpang wa ai shaloi na, Yaw Shada lam, Pungdung na ni hpe, ndai hpung ni Kabai da ra wa sai. Myen hpyen hte rau yup, rau sha, Myen shangun ai Order hkan galaw na she, malawng wa sai.

Ndai hku tsun na, ndai Uhpung ni hpe, Kachin n'rai sai, Kachin hpe n'tsaw ra mat sai ni ngu, tsun mayu ai n're. Byin wa ai Political trend, position, structure gaw, shai wa sai hpe, tsun mayu ai. Myit kata, Ngup Aga hta gaw, Kachin re majaw, myu hpe tsawra ,na re. Raitim Tatut magam bungli gaw, n'tsa de na Myen order kawn sa wa na. Kachin mungshawa masha aq akyu ara, kade ram, makawp maga, lu galaw ya na, ngu ai gasan hpe tsun taw ai re.

Ndai masa hpe yu yang, Kachin politics gaw, pandung awngdang lam n’lu ai sha n’ga, myen aq lata de grau grau hkrat sum, n’gun kya wa sai ga re. Anhte Kachin ni, grau grau n'na sadi maja ra wa sai re. Ndai zawn re masa hta, maja ra ai lam ni gaw.

(1) DKBA zawn Kachin shada gap hkat shangun wa ai zawn n’byin na. Ndai zawn re Order hkrat wa yang, gara hku ninghkap na ngu hpe, ya kaw na, asan sha, masing jahkrat n’na, maja nga ra na re.

(2) Tinang Uhpung kata na, ningbaw, malawm ni hpe, maja rum, sat, nat, ai lam ni, nga wa chye ai. (Kogang ningbaw hpe gyam n’na, shamat kau ai zawn.) N’gun naw ja ai Kachin armed group KIA zawn re n’nga yang, ndai zawn re mabyin, daini daina, byin wa na, aloi sha re. Ndai hpung ni Militia hkap la dat ai gaw, KIA hpe mung, grau na, masa shayak dat ai tai sai.

(3) Sut masa, mung masa, Militia, Parties hpa mi galaw galaw, SPDC’s tool (or) Myen aq nchyang mayam, Myen aq Policy hpe hkrang shapraw ya ai Kachin militia n’tai na, sadi nga ra na re. Moi Sama Duwa the Jinghpaw ningbaw ni, mungmasa Myi n’hpaw ai majaw, Myen lang ai shingna, Myen akyu ara aq matu, jai lang sha hkrum lai wa zawn, bai n’kahtam byin na, ahkyek ai. Labau hta, Myen gaw, English, Japan ni hpe pi, masu magaw n’na, lang lai wa ai hpe mung dum ga. Alang lang myen masu ai hpe, kam shut na, myit malai lu ai ni, n’tai ga. Myit malai lu ai hpang gaw, hpang hkrat sai re. Consequence hpe hkrum sha ra sai re. Tinang langai aq tinggyeng akyu ara, tinang langai aq ningmu hte, Amyu ting hpe dut sha ai ni, jam jau jaw ai ni, n’tai na, sadi ga.


Ya ndai lak nak Uhpung 3 gaw, kaning nchye di ai majaw, Myen aq masing hpe N’kam tim, hkap la ra ai ngu ga. Naw ngam nga ai KIA gaw tsep kawp ndai zawn Myen aq lata de Kachin Sinat hpe n’mai ap kau na re. Rawng malan n’awngdingsa, Kachin Sinat hpe, n’kabai kau ai ni mung nga ra na re. Mungmasa galaw ai ngu ai gaw, Common Goal (Kachin self-determination) hpe Aziyu let, shani shana, masing jahkrat, grau n’na, Kachin politics hkrung kaba n’gun ja wa hpe she Myit ga. Ya Militia tai mat ai ni mung, byin lai mat sai gaw, tinang aq Gawng kya lam aq majaw re hpe dum la na, ndai Goal de bai htang wa lu na, hkrang shapraw lu na hpe, myit nga ga.

Makau mi gaw, Kachin political rights aq matu galaw, makau mi gaw, shada, jahten ai baw bungli, tsep kawp, n’galaw na, Grai ahkyek ai re. Eg; Dukaba Naw Seng hpung ni hte, Sama Du Wa ni mungmasa ningmu n'hkrum ai majaw,hkrat sum ai zawn, bai n'kahtap rai na, ahkyek ai. Rawng malan hpe tinang n’lu galaw woi awn ai rai yang mung, galaw nga ai ni hpe, myitdaw, jahte tam ai baw, galoi hkum galaw mu. Kachin re the maren, du nga ai shara kaw na, Kachin akyu ara hpe, shani shagu na, sak hkrung lam hta, hpa lu galaw na, aq nawng lu na, ngu she myit nga ga. Nang ngai, Kachin akyu ara aq matu, daini, hpa lu galaw sai ngu hpe, shana yup wa mahka, galaw mung, Review galaw mu. Daini n’lu galaw jang, Hpawt ni ngai hpa lu galaw hkra, shakut na ngu hpe, hkrang shapraw mu. Rawt malan ningbaw galaw, Sinat hpai n’na, Kachin akyu ara hpe, (7) ya hta, kalang mung, n’lu galaw kau dat ai gaw, hkum rai mu. Jut shara kaw e aq nawng nga ai, ninbaw ningla, myu tsaw shayi shadang kaji kaba ma hkra, Kachin mai kaja lam hpe, hkrang shapraw galaw sa lu mu ga law, Akyu hpyi dat n’nga ai. Yawng hpe hkungga let.